Nga : Blerti DELIJA
Nëse policia do ta kishte lejuar të kalonte pa probleme për të hipur në traget, sot Elena Avdillari do të ishte një emër totalisht i panjohur, ashtu sic edhe ishte në fakt deri para 24 orëve. Pse e ka penguar policia të kalojë drejt Italisë? Aq më shumë, kur kishte kaluar edhe 14 herë të tjera po nga Durrësi drejt porteve të Italisë jugore. Nëna e saj thotë se Elena kishte me vete 600 euro dhe një garanci për të udhëtuar drejt shoqeve në vendin fqinj. Pjesa më tragjike e rrëfimit të nënës së viktimës lidhet me varfërinë e familjes dhe ndihmën që u jepte e bija, Elena për të mbijetuar.
E këtu futemi në atë që mbase është një histori tragjike shqiptare që përsëritet. Të paktën që nga 1990 e këtej. Është e lehtë të aludohet siç është edhe e vështirë të mbyllet goja. Policia po heton dy pista: atë të ngjarjes aksidentale por edhe të aksidentit të qëllimshëm. Nëse verifikohet hipoteza e pare, vdekja tragjike e 23- vjeçares do të arkivohet si “viktima e rradhës” e rrugëve shqiptare. Nëse jemi në pistën e dytë, atëhere mendoj se duhet të jemi të shqetësuar.
Sepse ka disa pyetje që mbase duan përgjigje. Cila ishte arsyeja që 23- vjeçarja doli e hyri 14 herë vetëm gjatë 2017-ës nga Shqipëria? Si nuk ra në sy të policisë dhe sistemit TIMS vajza e re, veçanarisht gjatë një viti me monitorim shumë të rreptë për shkak të azilkërkimit? Pse pikërisht kur kishte nisur një vit i ri kalendarik, kjo vajzë u pengua të kalonte drejt Italisë edhe pse sipas nënës, kushtet minimale të udhëtimit i kishte të plotësuara? A mund të jetë rastësi refuzimi i kalimit të 23- vjeçares në kufi dhe aksidenti tragjik i saj, në një taksi, vetëm pak minuta më pas?
A është rastësi që makina tip Benz e përfshirë në aksident, kishte ndryshuar pronësi por në sistem rezultonte me emrin e pronarit të vjetër? Si shpjegohet se aksidenti është verifikuar pranë një pike karburanti, e cila është shume e ndricuar dhe ku zakonisht makinat ulin shpejtësinë? Si shpjegohet që drejtuesi i Benz-it është larguar nga vendngjarja edhe pse mjeti ka mbetur aty dhe që lehtësisht mund të identifikohej?
Të gjitha këto pyetje mund të marrin shumë lehtë përgjigje. Rebusi zgjidhet duke u përqendruar tek e kaluara e viktimës në Itali (që zbardhet lehtësisht), tek personi që ishte në drejtim të Benz-it dhe normalisht, tek punonjësit e policisë në Portin e Durrësit. Jam i bindur se nuk do të zbulohet ndonjë “gjë e madhe”. Thjesht dë të hidhet dritë mbi një tjetër histori tragjike shqiptare. Për te paktën Elena dhe familjarët e saj do të jenë të qetë. Për atë qetësi që mund të krijohet pas stuhisë…
