Në stendën e shtëpisë botuese “NERAIDA”, në pavionet e panairit të librit, në mes titujve të librave të rinj, lexuesi do të gjejë edhe vëllimin me tregime “LAKURIQ”, të shkrimtarit Jani Malo. Faqet e këtij libri mbajnë brenda tyre 22 tregime, siç shkruan vetë autori në faqen e parë, të gjitha “mbathur me humor”. Një gjini letrare që kohët e fundit ka “humbur” nga sytë e lexuesve.
Jani Malo, falë përvojës së gjatë gazetareske, por edhe aftësisë për të zotëruar e përdorur “shpatën” e humorit”, e cila të “vret” e të “pret”, pa derdhur gjak, ka arritur të na japë një libër tërheqës në të lexuar e domethënës në të menduar, që na kujton fjalët e poetit, kritikut e dramaturgut amerikan, fitues i çmimit “Nobel” për letërsi në vitin 1948, Thomas Eliot, se: “Humorizmi është mënyra më e mirë për të thënë gjëra serioze”.
Në tregimet e Jani Malos, fshikullohen vese e dobësi të karaktereve njerëzore me të cilat ndeshemi çdo ditë në kohën që jetojmë, problematika e anë negative që janë kthyer në një plagë shoqërore, e cila duhet mjekuar e shëruar për ta shpëtuar shoqërinë nga degradimi moral. Gjithçka e shprehur me humor, ironi e sarkazëm, larg shprehjeve banale, të cilat na i servirin me shumicë në kohën e sotme pseudohumoristët e ekraneve televizive.
Merita e autorit, Jani Malo, qëndron në faktin se ai nuk tregon barcaleta, por thjesht vëzhgon realitetin dhe i thotë gjërat ashtu siç janë, “Lakuriq”, duke na bërë të reflektojmë e të mendojmë për të gjetur rrugët drejt së mirës nëpërmjet luftës ndaj së keqes, siç thotë edhe shkrimtari Mark Levy: “Humori është mënyra më e mirë për të neutralizuar realitetin kur ai na bie ndesh”.
