Vllaznia ndeshjen e rradhës do ta luajë ditën e dielë ndaj Skënderbeut .
Federata Shqiptare e Futbollit ka vendosur t’i shtyjë 24 orë të gjithë takimet e javës së 18-të të Superligës ngaqë siç dihet , në mesjavë do të luhen ndeshjet e Kupës së Shqipërisë . Nëse ndaj Kukësit , takimi u luajt nën dritën e projektorëve të stadiumit “Loro Boriçi”, këtë herë orari i zhvillimit të ndeshjes kundër korçarëve është caktuar ora 13.00 . Padyshim që kemi të bëjmë me një takim shumë të vështirë , ndoshta edhe më i vështirë madje se ai i javës që shkoi . Korçarët nuk mund t’ia lejojnë vetes dy gabime njëri pas tjetrit dhe do të luftojë për të fituar në Shkodër . Ndërkohë, Vllaznia vjen në këtë përballje me një moral të ulët ngaqë nuk e kishin llogaritur se do ta nisnin me humbje këtë vit . Nga ana tjetër , mësohet se skuadra do të ketë probleme edhe me formacionin se përveç Gocajt që ende nuk është rikuperuar plotësisht , mund të ketë mungesa edhe për arsye kartonash por kjo gjë do të zbardhet në ditët në vijim . Kuqeblutë patjetër do të tentojnë të marrin pikë sepse situata nuk flet në favorin e tyre . Ndodhen sërish në vendin e parafundit të renditjes dhe natyrshëm që një situatë e tillë nuk kënaq askënd . Trajneri Gjoka vazhdon të shprehë besimin e tij tek futbollistët që drejton por ka kërkuar pak durim nga drejtuesit , gazetarët dhe tifozët sepse mendon që Vllaznia e vërtetë do edhe pak kohë për të ardhur . Dikush edhe mund të presë por situata në fakt nuk lë vend për pritje . Lojtarët e ardhur në merkaton e janarit duhet të tregojnë vlerat e tyre dhe presioni po rritet megjithatë duhet të mësohen me këtë gjë . Në Shkodër kanë dëshirë që të mos përjetojnë të njëjtin ankth si sezonin e kaluar kur skuadra e tyre shpëtoi vetëm në ndeshjen e fundit të kampionatit prandaj dhe bëjnë thirrje për ndryshim të situatës sa më shpejt . Për këtë arsye , duan që Vllaznia ta tregojë veten që të dielën ndaj Skënderbeut .
