Është ndarë nga jeta Doktor Shahin Kadareja, vëllai i shkrimtarit të njohur Ismail Kadare.Sipas report tv, Shahin Kadare është ndarë nga jeta orët e para të mëngjesit të sotëm, pas një betejë më pak se njëvjeçare me një sëmundje të rëndë.Ai është një nga të parët doktorë të Shkencave në fushën e mjekësisë, me një kontribut të jashtëzakonshëm në studimet onkologjike, si referues në dhjetëra konferenca dhe kongrese ndërkombëtare shkencore.Ai ka botuar studimet e tij shkencore në revistat më të njohura të mjekësisë në botë.Doktor Shahin Kadare fillimisht u diplomua në vite ’60 në Tiranë dhe më pas kreu një specializim në Rumani. Ndershmëria, përkushtimi dhe profesionalizimi i tij, e kthyen atë në një autoritet të padiskutueshëm shkencor në fushën e onkologjisë.Ai është themelues i Laboratorit të Morfologjisë Patologjike dhe ka luajtur një rol kyç në zhvillimin e kësaj dege të mjekësisë në Shqipëri, përmes diagnostifikimit mikroskopik të tumoreve. Ai arriti të krijoje në bashkëpunim me kirurgët shqiptarë të kohës, skemën e trajtimit operativ të tumoreve, duke verifikuar rrezikshmërinë e tyre qysh gjatë operacionit.Nga ana tjetër Doktor Shahini ishte një simbol i përkushtimit dhe përgjegjësisë njerëzore për jetën dhe shëndetin e njerëzve. Ai do të mbahet mend si doktori që lehtësonte dramën e madhe të sëmundjeve të rënda me të cilët përballej me pacientët e tij, me durimin dhe qetësinë e një profesionisti të rrallë.
Shahin Kadareja ishte një qytetar i angazhuar, një intelektual antikonformist, një refuzues i mediokritetit dhe banalitetit në jetën publike dhe sidomos politikën shqiptare.Ai është një nga themeluesit e Partisë Demokratike në vitin 1990, dhe një nga kritikët e parë të mëdhenj të lidershipit të saj si refuzues i autoritarizmit post-komunist.Ai shërbeu për disa vite, pas vitit 1997 si ambasador i Shqipërisë në Suedi dhe vende të tjera, por iu rikthye serish profesionit të mjekut.Doktor Shahin Kadare është vëllai i shkrimtarit tonë të madh Ismail Kadare, me të cilin pat ndërtuar një raport të rrallë njerëzor dhe intelektual.Ai ishte adhurues i madh intelektual i tij, lexuesi më i madh i tij, kritiku më pa drojë i jetës dhe veprës së tij dhe mbështetësi më i madh në jetën e tij. Së bashku me gruan dhe fëmijët e tij, ndërtuan një raport familjar dhe njerëzor, që e bëri Familjen Kadare më të madhe dhe me te forte.Doktor Shahin Kadareja la pas gruan dy fëmijë të suksesshëm, të shkolluar në Perëndim, të cilët e bënë atë krenar deri në fund të jetës së tij.
