Sheqere Sina -Lushnjë 
Është një mall i hershëm, për bij të përvëluar.Për bij që janë aty dhe s’janë aty.Materia, s’ka rëndësi në këto raste.Shpirti, shpirti, fle aty dhe zgjohet, i jep ngjyrën e përhershme festive, asaj që brof papritur, me ngjyra vendlindjeje…
Më gufon zemra, rreh si një shpend i lirë, teksa i afrohem qytetit tim të lindjes.Seç më flet një shkëmb, seç pëshpërin një shkurre e mbushur sërishmi me petale tetori, seç mërmëron një gur i vjetër; nga ata të dikurshmit, që ende janë aty dhe s’lëvizin.Edhe s’kanë për të lëvizur kurrë!
E, po, këtu, përtërihet shpirti.’’Ngadalë-i them tim biri- ngadalë se qyteti im është sa i brishtë edhe i sertë, kujdes rrugën; është si një pendëzë shkrimi; është, edhe si një labirith pa krye…
Është data 14 tetor 2023! E gdhenda, sigurisht që e gdhenda këtë datë në kujtesën time mbushur plot me të dikurshmen.E tashmja dhe e dikurshmja përqafohen miqësisht dhe pyesin njëra-tjetrën se cila është më e rëndësishme. Unë qesh dhe rrjedh në natyrën time, si Shkumbini në euforinë e vet!
Afrohemi afër pallatit të kulturës “Sadi Halili”, në qytetin e lindjes, në Librazhdin tim.Ej! Unë jam pronare këtu,këtu jam edhe pengu i ëndrrave të mia! Kujtime dhe ngjarje, që ngjallen dhe fiken si hije, më përshkojnë brenda vetes; dalin e hyjnë si mysafirë të ftuar dhe të paftuar dhe pastaj, s’di ku treten në humbëtirën e jetës së dikurshme shkollore…që qesh sërishmi si një çupkëzë lozonjare.
…gjendem papritur në pallatin e kulturës Sadi Halili, në qytetin e Librazhdit.Unë kam qenë dikur aty dhe sot jam sërish…Si një ish gjimnaziste Shebeniku, si një shkrimtare e ftuar, që kam thënë diçka; ashtu siç e ndiej dhe siç më kanë ndierë duke më thënë:Mirë se erdhe e dashur bijëzë!
Na mblodhi këtu, titulli ‘’Qytetar nderi’’ i bilbilit të Çermenikës, këngëtarit profesionist (edhe vëllai ynë),Hysni Hoxha.Të qoftë i bekuar zëri, të qoftë i ndritur nderi, Hysni Hoxha!Të pranishëm: Këngëtarë e artistë nga të gjitha trojet shqiptare.
Jam krenare që jam vajza e kësaj toke; tani e ndiej më shumë peshën që kam .
Është një datë që shënoi në kalendar një takim njerëzor të mrekullueshëm.
Qofsh i bekuar, Librazhdi im! Qofsh i ndritur përherë Hysni Hoxha! E paç zërin kështu, të mrekullueshëm; si era që këndellet mbi Shkumbin, si furtunat që burojnë traditën e Shebenikut tim. Jam e bekuar që kam lindur aty…, bijë e kësaj toke të brishtë dhe të ashpër njëherësh.
Aty, në pallatin e kulturës’’Sadi Halili’’ këndohen këngë patriotike, këngë Shqipërie.Sa shpirtra ngjalli, atëherë, kur virusi famëkeq zgjohej dhe mundohej të hante jetë njerëzish!Bilbili Çermenikës jepte shpresë jete me zërin e tij të kulluar.Sërishmi, aty, bilbili i Çermenikës i këndon jetës së bukur, jetës që s’ka vdekje kurrë!
Koncert magjik nga zëri i Hysni Hoxhës.Ka artistë dhe këngëtarë nga mbarë kombi shqiptar, ardhur enkas për respektin e këtij burri të lartë që i burojnë vlerat nga zemra e bukur e popullit që e do shumë.
Pjesëmarrja e nderuar e aktorit humorist nga Gjakova z. Arben ,mbreti i aktrimit, ‘’Kalorësi i Artë Gjergj Kastrioti’’ prof. Xhevat Limani, që me intepretimin e tij, shpërtheu si lumë lotët e të pranishmëve.Emocione në sallë me: “Shpirtërisht për ty Shqipëri ‘’ S’janë të pakta rekordet që ka thyer autori!Pa harruar atmosferën e ndezur nga këngëtari brilant shkodran Tole.Tenor magjik; ikonë kombëtare; pranë partnerja, Besjana Tole!Shpërthyen gjokset nga brohoritjet; të pafundme duartrokitjet e rradhës !
Kjo ndodhi këtu, në Librazhdin tonë, që shquhet për muzikën, lindur e rritur nga natyra e mrekullueshme e atij Shebeniku, që jep i forcë, dashuri dhe vitalitet të pashtershëm. Ky vend ka lindur djem dhe vajza që kanë kontribuuar dhe dhe shquhen nëpër botë. Janë dinjiteti dhe personaliteti i burimit të parë, i burimit që i ka rritur dhe u ka dhënë jetë e traditë.Jemi krenarë kudo për njeriun e punës që përhap dashuri dhe paqe …paqe e bujari në të gjithë botën.
Ishin miqtë e ardhur nga larg, që mbushën zemrat plot, në këtë kinoteatër, jo vetëm me interpretime, por më shumë me magjinë e artit.Në sy shikoje ndriçimin e lotëve të mallit. S’e le dot mënjanë zonjën Fatime Kalimashi. Zonja e madhe, e ardhur nga Zvicra, interpretoi këngët që dukej sikur buronin ëmbël nëpër rrjedhën e kristaltë të Shkumbinit.
Ashtu rridhte edhe zemra e kristaltë e banorëve.
Sërish bilbili i Çermenikës dhe familja me taban, si shkëmbinjtë e Shebenikut, shtrirë dhe me themel të fortë.
Hysni Hoxha, Afërdita Hoxha me vajzën, Aishe, si zëri i lindur i thëllëzës. Kjo vajzë mbushi nënat e përmalluara me dashurinë shqiptare, ardhur nga Zvicra…
U ndieva motra e tyre, u dhurova tufëza lulesh, sepse zemra librazhdëse është bujare,e bardhë, e bukur. Dera e shtëpisë rri e hapur për miqtë, sidomos për miqtë e veçantë…
Kënaqësia është e madhe, ardhja e miqve qëq mbush zemrën plot, sidomos kur në skenë del regjisori i eventit; “Mjeshtri i madh “, Prof. Minella Kureta. E më pas,një punim, një dedikim në shalqin, punuar me mendje të mprehtë nga duart e arta të znj. Kadife Kariqi…
Përshëndetje nga Ansambli Çermenikës, pastaj, me rrobat e qëndisura nga sorkadhet e Librazhdit…
Z .Hysni me zonjën e vet, jo vetëm nënkryetari i Këshillit të Qarkut të Elbasanit, por edhe gazetarët , edhe zonja e shtëpise së kulturës “Bardha Alimeta “në Librazhd, na pritën krahëhapur, na dhuruan dashuri dhe jetë njerëzore.Të bukur!
Vendasit qëndruan më shumë në këmbë, për shkak të pjesëmarrjes.Tradita e Librazhdit tim kështu e do; në krye të vatrës ulim mikun.Mikun tonë, Hysni Hoxha, dekoruar si ‘’Nderi i Kombit, nderin tonë për të qenë të mirë dhe të bukur në shpitr.
Faleminderit, suksese!
