Partia CSU qeveris në Bavari që nga viti 1957 në kontinuitet. Respekt për hapin e madh të deputetit Balidemaj, i cili vendimin e arsyeton me faktin se më tej nuk mund të identifikohet me Partinë e Gjelbër, veçanërisht për temat kyçe si Migracioni dhe siguria e brendshme.
Deli Balidemaj, përveç që është deputet në parlamentin e Bavarisë së Epërme, ka edhe dy pozita të tjera me rëndësi: këshilltar në Këshillin Bashkiak të Mynihut dhe nënkryetar i parë i Asamblesë München-Feldmoching/Hasenbergl.
Balidemaj, i afërt me politikanët e Kosovës dhe Shqipërisë, përmes rrjeteve sociale dha këtë komunikatë për shtyp:
Komunikatë për shtyp
Pas shumë vitesh angazhimi aktiv në Partinë e Gjelbër, gjatë të cilave isha plotësisht i përkushtuar ndaj mbrojtjes së mjedisit dhe klimës, drejtësisë sociale dhe një bashkëjetese në harmoni me njëri-tjetrin, sot kam marrë vendimin të kaloj në Partinë CSU. Ky vendim nuk ishte i lehtë për mua. Gjatë kohës sime me të Gjelbrit, fitova përvojë të vlefshme, mora pjesë në projekte të rëndësishme dhe kisha kënaqësinë të punoja me njerëz të shumtë frymëzues dhe të përkushtuar. Unë jam thellësisht mirënjohës për gjithë këtë dhe do të më mbetet gjithmonë në kujtesë të mirë.
Megjithatë, arsyeja për kalimin tim qëndron në besimin se CSU po ndjek qasjet e duhura në peizazhin aktual politik për të përballuar sfidat kryesore të kohës sonë – veçanërisht në fushat e migrimit dhe sigurisë së brendshme, në të cilat unë jam specializuar për shumë vite. Unë shoh nevojën për t’i trajtuar këto çështje me një politikë të qartë dhe të orientuar drejt zgjidhjes, që jo vetëm të jetë e qëndrueshme në afat të gjatë, por edhe të forcojë kohezionin social.
Gjatë veprimtarisë sime në politikat e migracionit dhe sigurisë, kuptova se nevojiten veprime dhe qasje të qarta duke marrë parasysh aspektet humanitare dhe ato të sigurisë. CSU mbështet zgjidhje pragmatike që i marrin seriozisht këto sfida dhe në të njëjtën kohë sigurojnë paqen sociale.
Tani do të doja të sjell përvojën dhe pasionin tim në një parti që ndërthur traditën dhe progresin dhe fokusohet në politika që krijojnë zgjidhje të qëndrueshme për të ardhmen. U gëzohem shumë detyrave të reja dhe bashkëpunimit me anëtarët e CSU për politikat konstruktive për vendin tonë.
Me respekt,
i juaji Deli Balidemaj
