Rektori Gjuraj, në një deklaratë për shtyp para mbledhjes së Senatit Akademik, ka prezantuar prioritetet kryesore që do të diskutohen.
Pika e parë që u nënvizua është se numri i studentëve aktivë në universitet ka arritur në 3886 duke shënuar një tendencë në rritje krahasuar me vitin e kaluar. “Ky rezultat,” tha ai, “është një tregues i qartë i besimit që studentët dhe familjet e tyre kanë në cilësinë e arsimit që ofron universiteti ynë.”
Gjithashtu, Rektori foli për ofertën e re akademike, duke theksuar se janë aplikuar 14 programe të reja studimi, ndërsa po vijon rishikimi i programeve ekzistuese, veçanërisht në fushën e shkencave shoqërore. Ai deklaroi se këto hapa janë të domosdoshëm për të përmbushur nevojat e tregut dhe për të ruajtur standardet e larta akademike që përfaqëson institucioni.
Në vijim, Rektori vuri theksin te përpjekjet për rritjen e granteve për kërkime shkencore, duke e konsideruar këtë një prioritet strategjik. “Kërkimi shkencor është shtylla e së ardhmes për çdo universitet modern,” theksoi ai. Për më tepër, ai bëri të ditur planet për përdorimin e Spitalit të vjetër në funksion të departamenteve klinike dhe paraklinike, si dhe ndërtimin e një laboratori modern për testet dhe kërkimin shkencor në shkencat e lëvizjes.
Në përfundim, Rektori Gjuraj ritheksoi angazhimin e tij për të udhëhequr universitetin drejt një të ardhmeje që mishëron transparencën, respekton traditën dhe përqafon transformimin, duke siguruar cilësi të lartë akademike dhe shkencore për të gjithë komunitetin.
