Ky takim synoi të nxjerrë në vëmendje të pjesëmarrësve punën e palodhur të studiuesit z. Ndriçim Kulla , i cili ka lëvruar në disa fusha të dijes.
Z.Kulla me librat e tij është prodhimtar në fushë të mendimit historik, filozofik, letrar, antropologjik, e albanologjik, si: “Antologji e mendimit shqiptar 1840-1945”; “Dritëhije shqiptaro-greke”; “Neoshqiptarizmi-një model i braktisur”, (libër studimor me shqyrtime politiko-shoqërore); “A jemi shqiptarë apo do të bëhemi”; “Etika dhe iluminizmi”; librin historiko-filozofik “Për rishkrimin e historisë shqiptare”.
Po ashtu në fushë të botimeve, studiuesi Kulla ka shkruar edhe librin studimor të komentuar “Celësa për të hapur thesarin Fishtjan”. Ai është autor i librave “Mendimi filozofik, sociologjik dhe psikologjik shqiptar”; “Mendimi kritik letrar shqiptar”; “Rikthimi tek etërit tanë themelues”; librin politologjik “A ka jetë përtej të majtës dhe të djathtës”, dhe një monografi kushtuar njërit prej figurave të spikatura në rreshtin e albanologëve, “Atë Giuseppe Valentini, albanologu më i madh i shek.20”.
Në vazhdën e botimeve të tij bën pjesë vepra “Ylli i shkrimtarit”, një biografi e shkrimtarit I.Kadare, nga koha e tiranisë deri në ditët e sotme.
Së fundmi, kemi në dorë një tjetër botim të vyer të studiuesit të palodhur z. Ndriçim Kulla, “Shqipëria një histori e mentalitetit juridik”, për të cilin jemi mbledhë sot në praninë e studiuesit të nderuar të shijojmë së bashku vlerën dhe karakteristikat e kësaj pene me shumë dimensione.
